കാണെക്കാണെ; ബന്ധങ്ങളുടെ ആഴങ്ങളിലൂടെ ഒരു ഇമോഷണൽ യാത്ര

1 month ago 5
-സന്ദീപ് സന്തോഷ്-

കാണെക്കാണെ; ബന്ധങ്ങളുടെ ആഴങ്ങളിലൂടെ ഒരു ഇമോഷണൽ യാത്ര


ഉയരെ എന്ന സൂപ്പർഹിറ്റ് ചിത്രത്തിന് ശേഷം മനു അശോകൻ സംവിധാനം ചെയ്ത പുതിയ ചിത്രമാണ് 'കാണെക്കാണെ'. സുരാജ് വെഞ്ഞാറമൂട്, ടൊവിനോ തോമസ്, ഐശ്വര്യ ലക്ഷ്മി, ശ്രുതി രാമചന്ദ്രൻ, പ്രേം പ്രകാശ് തുടങ്ങിയവർ പ്രധാന വേഷങ്ങളിൽ അഭിനയിച്ചിരിക്കുന്ന ചിത്രം സോണി ലിവിലൂടെയാണ് പുറത്തിറങ്ങിയത്.

വാഹന അപകടത്തിൽ മരിച്ച മകളുടെ ഓർമ്മകളും പേറി ജീവിക്കുന്ന ഒരച്ഛനിലൂടെയാണ് ചിത്രം സഞ്ചരിക്കുന്നത്. പാലായിൽ ഡെപ്യൂട്ടി തഹസീൽദാറായ പോൾ എന്ന ഈ കഥാപാത്രത്തെ അവതരിപ്പിക്കുന്നത് സുരാജാണ്.

എറണാകുളത്തുള്ള മരുമകനായ അലനിൻ്റെ വീട്ടിലേക്ക് പോൾ എത്തുന്നിടത്താണ് കഥ ആരംഭിക്കുന്നത്. പോളിൻ്റെ മകളായ ഷെറിൻ്റെ മരണശേഷം അലൻ വീണ്ടുമൊരു വിവാഹം ചെയ്തിരുന്നു. തൻ്റെ മകളുടെ അഭാവത്തിലും അവളുടെ മകനായ കുട്ടുവും, അലനും, അലനിൻ്റെ ഭാര്യ സ്നേഹയും സാധാരണ ജീവിതം നയിക്കുന്നത് പോളിനെ ചെറുതായി അസ്വസ്ഥനാക്കുന്നുണ്ട്. കുട്ടു സഹിതം എല്ലാവരും പതിയെ ഷെറിനെ മറക്കുന്നതായി തോന്നുന്നതായി അയാൾക്ക് തോന്നുന്നുണ്ട്. കുട്ടുവിനെ സ്വന്തം മകനെപ്പോലെ സ്നേഹ നോക്കുന്നതാണ് അയാളുടെ ഏക ആശ്വാസം.

Also Read: തുഗ്ലക് ദര്‍ബാര്‍

ചെറുമകൻ്റെ പിറന്നാൾ ആഘോഷിക്കുക എന്നതിനൊപ്പം അപകടവുമായി ബന്ധപ്പെട്ട കേസിനെക്കുറിച്ച് വക്കീലിനോട് സംസാരിക്കാനുമാണ് പോൾ എറണാകുളത്തേക്ക് എത്തിയത്.

ഷെറിൻ്റേത് ഒരു സാധാരണ അപകട മരണമാണെങ്കിലും പോൾ കേസ് അവസാനിപ്പിക്കാൻ തയ്യാറല്ലായിരുന്നു.
മകൾക്കൊപ്പമുള്ള പഴയ ഓർമ്മകളിലൂടെ കടന്നുപോകുന്ന ഒരു ഘട്ടത്തിൽ പോളിന് ചില സംശയങ്ങൾ ഉണ്ടായി.
രണ്ട് വർഷങ്ങൾക്ക് ശേഷമാണെങ്കിലും അപകടം നടന്ന സ്ഥലം സന്ദർശിക്കുകയും, സംഭവത്തേക്കുറിച്ച് അവളുടെ കൂട്ടുകാരിയോട് സംസാരിക്കുകയും ചെയ്യുമ്പോൾ പോളിൻ്റെ സംശയം കൂടുതൽ ബലപ്പെട്ടു. പോൾ തൻ്റെ ചോദ്യങ്ങൾക്കുള്ള ഉത്തരം അന്വേഷിക്കുന്നതും, തുടർന്നുള്ള കാര്യങ്ങളുമാണ് ചിത്രം പറയുന്നത്.

വാർത്തകളിലൂടെ ദിവസേന നമ്മൾ അറിയാറുള്ള സംഭവങ്ങളുമായി സാമ്യം തോന്നുന്ന കഥയാണ് ചിത്രത്തിലേത്.
തെറ്റുകൾ ചെയ്ത ഒരു വില്ലൻ, അയാളിലേക്ക് എത്തിച്ചേരുന്ന നായകൻ -അങ്ങനെയുള്ള പതിവ് രീതിയല്ല ബോബി-സഞ്ജയ് എഴുതിയ തിരക്കഥയിലുള്ളത്. ഓരോ മനുഷ്യരുടേയും അവസ്ഥകളാണ് അവരിൽ മാറ്റം വരുത്തുന്നത്, ആ അവസ്ഥകൾ ബോധ്യപ്പെടുത്തി തെറ്റും ശരിയും എന്താണെന്ന് പ്രേക്ഷകരെക്കൊണ്ടും ചിന്തിപ്പിച്ചാണ് തിരക്കഥ പുരോഗമിക്കുന്നത്. കുടുംബ ബന്ധങ്ങളുടെ ആഴവും പരപ്പും വെളിവാക്കുന്ന കഥയ്ക്ക് ഒരു ത്രില്ലറിൻ്റെ ലെയറും തിരക്കഥാകൃത്തുക്കൾ നൽകിയിട്ടുണ്ട്. പ്രേക്ഷകർ സ്വാഭാവികമായും മുൻകൂട്ടി കാണുന്ന സാധ്യതയാണ് തിരക്കഥയും പ്രയോജനപ്പെടുത്തിയത്.

Also Read: ക്യാ മേരി സോനം ഗുപ്ത ബേവഫാ ഹെ?

ഷെറിൻ്റെ മരണത്തിൽ പോളിന് ദുരൂഹതകൾ തോന്നുമ്പോൾ അയാൾ അതിനെക്കുറിച്ച് അന്വേഷിക്കുന്നു. ആദ്യ പത്ത് മിനുട്ടുകൾക്ക് ശേഷം ചിത്രത്തിൽ ത്രില്ലറിൻ്റെ ലെയർ തുറക്കപ്പെടുകയും ചെയ്തിട്ടുണ്ട്.

സസ്പെൻസ് ത്രില്ലറായി ചിത്രം മുന്നേറുമെന്ന് കാഴ്ചക്കാർ പ്രതീക്ഷിക്കുമെങ്കിലും, ബന്ധങ്ങളിലെ ഇഴയടുക്കും ഉലച്ചിലുമാണ് കഥയുടെ മെയിൻ ട്രാക്ക്. കഥാഗതിയിൽ ഒരിടത്തും മുഷിച്ചിലുണ്ടാക്കാത്ത വിധത്തിൽ വരിഞ്ഞുമുറുക്കിയാണ് തിരക്കഥ ഒരുക്കിയിരിക്കുന്നത്. ത്രില്ലറെന്ന രീതിയിൽ പ്രേക്ഷകർക്ക് അമിത പ്രതീക്ഷകൾ നൽകാതെ, പതിയെ പതിയെ ബന്ധങ്ങളുടെ വിവിധ വർണ്ണങ്ങൾ പ്രേക്ഷകർക്ക് മുന്നിലേക്ക് എത്തിക്കാൻ കഴിഞ്ഞതാണ് തിരക്കഥയുടെ ഏറ്റവും വലിയ വിജയം. നിയമത്തിനപ്പുറം മനുഷ്യമനസ്സിലെ ശരിയും തെറ്റും വേർതിരിക്കേണ്ടത് എങ്ങനെയാണെന്ന് കാണികളെ ബോധ്യപ്പെടുത്തുന്ന തിരക്കഥയിൽ, കുട്ടികൾക്കായ് പിടിവലി നടത്തുന്നവരടക്കം തിരിച്ചറിയേണ്ട ചില സന്ദേശങ്ങളും ഉൾപ്പെടുന്നുണ്ട്.

ഉയരെ എന്ന ചിത്രവുമായി താരതമ്യം ചെയ്യുമ്പോൾ കാണെക്കാണെ-യുടെ സ്ഥാനം എവിടെയാണെന്ന് ചർച്ച ചെയ്യുന്നതിൽ പ്രസക്തിയില്ല. അവതരണത്തിൻ്റെ കാര്യത്തിൽ സംവിധായകൻ്റെ മുൻ ചിത്രവുമായി വളരെയധികം വ്യത്യാസമാണ് 'കാണെക്കാണെ'യിൽ കാണാനായത്. വളരെ റിയലസ്റ്റിക്കും, അതിനൊപ്പം അൽപ്പം സിനിമാറ്റിക്കുമായ അവതരണ ശൈലിയാണ് ഇത്തവണ മനു അശോകൻ സ്വീകരിച്ചത്. ആദ്യ രംഗത്തിൽ സുരാജിൻ്റെ കഥാപാത്രത്തെ പരിചയപ്പെടുത്തുന്നതു മുതൽ സംവിധായകൻ്റെ കയ്യടക്കം വ്യക്തമാണ്.

Also Read: ഭൂത് പോലീസ്

സുരാജിൻ്റേയും, ടൊവിനോയുടേയും കഥാപാത്രങ്ങളെ വളരെ മികച്ച രീതിയിൽ കഥയിലേക്ക് ചേർക്കാൻ സാധിച്ച സംവിധായകൻ ശ്രുതി രാമചന്ദ്രന് വേണ്ടിയിരുന്ന സ്ക്രീൻ പ്രസൻസ് നൽകിയിട്ടില്ല. ഷെറിനെ സൃഷ്ടിക്കുന്നതിൽ ബോബി-സഞ്ജയ് വേണ്ടത്ര ശ്രദ്ധ കൊടുക്കാതിരുന്നതിനാൽ പ്രേക്ഷകർക്കും ആ കഥാപാത്രത്തിനും ഇടയിൽ കണക്ഷൻ ഉണ്ടാകാതെ പോകുകയായിരുന്നു. ചിത്രത്തിൽ മെച്ചപ്പെടുത്താനായി ആകെയുള്ളത് ഷെറിൻ്റെ ഭാഗം മാത്രമാണ്.

ബാക്കിയുള്ള എല്ലാ സ്റ്റേഷനുകളിലും ചിത്രം അതിൻ്റെ ട്രാക്കിലൂടെ കൃത്യമായി എത്തിയിട്ടുണ്ട്. ഒടിടിക്ക് വേണ്ടി തന്നെ നിർമിച്ചതാണെങ്കിലും മേക്കിംഗിൽ ഒരിടത്തും അതൊരു കുറവായി തോന്നിയിട്ടുമില്ല. നല്ലൊരു കഥ വിശ്വസനീയമായ രീതിയിൽ അവതരിപ്പിച്ച സംവിധായകൻ തൻ്റെ ഉദ്യമത്തിൽ പൂർണ്ണമായും വിജയിച്ചിട്ടുണ്ട്.

സുരാജ്, ടൊവിനോ, ഐശ്വര്യ എന്നിവരുടെ പ്രകടനങ്ങളാണ് ചിത്രത്തിൻ്റെ ജീവൻ. ചുറ്റുപാടുകളും, സഹചര്യങ്ങളും, സംഭാഷണങ്ങളും കഥാപാത്രങ്ങളെക്കുറിച്ച് പറഞ്ഞു തരുന്നതിനേക്കാൾ കൂടുതൽ താരങ്ങളുടെ മുഖങ്ങളിലൂടെയാണ് പ്രേക്ഷകർക്ക് മനസ്സിലാക്കാൻ കഴിയുന്നത്. തികച്ചും അനുയോജ്യരായ അഭിനേതാക്കൾ തന്നെയാണ് കഥാപാത്രങ്ങളുടെ വേഷങ്ങളണിഞ്ഞത്.

Also Read: തലൈവി

സുരാജ് വെഞ്ഞാറമൂട് ഇതുവരെ ചെയ്തിട്ടുള്ളതിൽ നിന്നും കഥാപാത്രത്തെ വേറിട്ടു നിർത്തുന്ന ഗംഭീര അഭിനയമാണ് പുറത്തെടുത്തത്. 'ആക്ഷൻ ഹീറോ ബിജു' എന്ന ചിത്രത്തിൽ തുടങ്ങിയ സുരാജിലെ നടൻ്റെ യാത്ര കാണെ കാണെ ഉയർന്നുയർന്ന് ശിഖിരത്തിൽ എത്തി നിൽക്കുകയാണ് കാണെക്കാണെയിൽ. കഥാപാത്രം ഉൾക്കൊള്ളുന്ന വികാരങ്ങൾ അനുനിമിഷം പ്രേക്ഷകർക്ക് തിരിച്ചറിയാനാകും.

നടൻ സംഭാഷണങ്ങൾ കൈകാര്യം ചെയ്തിരിക്കുന്ന രീതിയിലൂടെ കഥാപാത്രത്തിൻ്റെ വേദന പോലും അനുഭവിപ്പിച്ച് ഞെട്ടിക്കുകയാണ്. വൈകാരികമായ മുഹൂർത്തങ്ങൾ ചിത്രത്തിലുടനീളം കാണാനുണ്ടെങ്കിലും, ഹോട്ടൽ റൂമിൽ വെച്ചുള്ള ഒരു രംഗത്തിൽ ഇമോഷൻസിൻ്റെ അണക്കെട്ട് തകർന്ന അവസ്ഥയായിരുന്നു.

സുരാജും ടൊവിനോയും തമ്മിലുള്ള കോംമ്പിനേഷൻ രംഗമായിരുന്നു അത്. രണ്ട് കഥാപാത്രങ്ങളുടേയും മനസ്സിൽ എന്തൊക്കെയാണ് ഓടുന്നതെന്ന് വ്യക്തമായി മനസ്സിലാകുന്നതിനാൽ ആയിരിക്കാം ആ രംഗത്തിന് വളരെയധികം തീവ്രതയാണ് അനുഭവപ്പെടുന്നത്.

Also Read: ടക്ക് ജഗദീഷ്

"പക്ഷേ പറ്റിക്കാനാണെങ്കിലും ആരോടും ഇങ്ങനെയൊന്നും പറയല്ലെന്ന് പറയണം സാറേ'' -പണ്ട് ഈ സംഭാഷണം സുരാജ് പറഞ്ഞപ്പോൾ കണ്ണു നിറഞ്ഞിട്ടുള്ളവർക്ക് അതിനേക്കാളും ഹൃദയത്തിൽ കൊള്ളുന്ന രംഗങ്ങൾ ചിത്രത്തിൽ നിന്നും ഏറ്റുവാങ്ങേണ്ടി വരും. ആസ്വാദനത്തെ ബാധിക്കുന്നതിനാൽ രംഗങ്ങളും, സംഭാഷണങ്ങളും കൂടുതൽ വിശദീകരിക്കാൻ കഴിയില്ല.

ചിത്രത്തിൽ ടൊവിനോയ്ക്ക് വലിയ റോൾ ഉണ്ടാകില്ല എന്നാണ് ആരംഭത്തിൽ തോന്നിയത്, പക്ഷേ ടൊവിനോയ്ക്ക് ലഭിച്ചതും ശക്തമായ കഥാപാത്രമായിരുന്നു. അഭിനയത്തിൽ മുന്നിലുള്ളത് സുരാജ് തന്നെയാണെങ്കിലും, തൊട്ടു പിറകിൽ ടൊവിനോയും എത്തുന്നുണ്ട്. സുരാജിനൊപ്പമുള്ള കോമ്പിനേഷൻ രംഗങ്ങളിലാണ് ടൊവിനോയും കൂടുതൽ തിളങ്ങിയതെന്നത് ശ്രദ്ധിക്കേണ്ടതാണ്.

ഐശ്വര്യ ലക്ഷ്മി, ശ്രുതി രാമചന്ദ്രൻ, പ്രേം പ്രകാശ്, സുരാജിൻ്റെ ചെറുമകനായെത്തിയ കുട്ടി എന്നിവരും തങ്ങളുടെ റോളുകൾ ഭംഗിയായി നിറവേറ്റിയിട്ടുണ്ട്. ബിനു പപ്പു അടക്കമുള്ള ചില താരങ്ങളും ഇടയ്ക്ക് മിന്നിമറഞ്ഞെങ്കിലും അവർക്ക് കൂടുതലൊന്നും ചെയ്യാനില്ലായിരുന്നു.

Also Read: മലിഗ്നൻ്റ്

ഛായാഗ്രാഹകൻ കഥയെ അടുത്തറിഞ്ഞതിൻ്റെ ഫലം ദൃശ്യങ്ങളിൽ കാണാനുണ്ട്. ചിത്രത്തിൻ്റെ സ്വഭാവമറിഞ്ഞ് ക്യാമറ ചലിപ്പിച്ചത് ആൽബിയാണ്. സംവിധായകൻ്റെ ശ്രമങ്ങളെ വിജയത്തിലെത്തിച്ചതിൽ എഡിറ്റിംഗ് നിർവ്വഹിച്ച അഭിലാഷ് ബാലചന്ദ്രനും പങ്കുണ്ട്. ഫ്ലാഷ്ബാക്ക് രംഗങ്ങൾ ഭംഗിയായി തുന്നിപ്പിടിപ്പിച്ചും, ബോറടിപ്പിക്കാത്ത വിധം ഷാർപ്പാക്കിയും ചിത്രത്തെ രൂപപ്പെടുത്താൻ അഭിലാഷിനായി. ആകെ ഒരു പാട്ടാണ് ചിത്രത്തിലുള്ളത്, സിത്താര കൃഷ്ണകുമാറിൻ്റെ ശബ്ദത്തിലും ജി.വേണുഗോപാലിൻ്റെ ശബ്ദത്തിലും രണ്ട് തവണ കേൾക്കുന്ന ഗാനം പകർന്ന അനുഭവവും വ്യത്യസ്തമാണ്. വിനായക് ശശികുമാർ വരികളെഴുതി രഞ്ജിൻ രാജ് ഈണമേകിയ ഗാനത്തിൻ്റെ ക്ലൈമാക്സിലുള്ള വെർഷനാണ് കൂടുതൽ മികച്ചു നിന്നത്.
മനുഷ്യൻ്റെ ഇമോഷൻസിനേയും, അവസ്ഥയേയും പ്രതിനിധീകരിച്ച രഞ്ജിൻ രാജിൻ്റെ പശ്ചാത്തല സംഗീതവും ഗംഭീരമായിരുന്നു.

കയറ്റവും ഇറക്കവും, കൂട്ടിക്കുറയ്ക്കലുകളും എല്ലാം കഴിഞ്ഞ് ക്ലൈമാക്സിലേക്ക് എത്തുമ്പോൾ അവിടെയും സംവിധായകൻ വിസ്മയിപ്പിക്കുന്നു. ഇതിതും മികച്ച ക്ലൈമാക്സ് ഈ ചിത്രത്തിന് നൽകാനാകുമെന്നും തോന്നുന്നില്ല. തീർച്ചയായും കണ്ടിരിക്കേണ്ട ഫാമിലി ഡ്രാമ ചിത്രമാണ് 'കാണെക്കാണെ' എന്ന നിഗമനത്തിലേക്ക് ധൈര്യപൂർവ്വമാണ് എത്തിച്ചേരുന്നത്. സോണി ലിവ് പ്രദർശനത്തിനെത്തിച്ച ആദ്യ മലയാള ചലച്ചിത്രം പ്ലാറ്റ്ഫോമിനും പ്രേക്ഷകർക്കും ഒരുപോലെ സംതൃപ്തിയേകുന്നതാണ്.

Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക

ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ

Web Title : suraj venjaramood, tovino thomas, aishwarya lekahmi starrer kaanekkaane malayalam movie review rating
Malayalam News from malayalam.samayam.com, TIL Network

Read Entire Article