റിസയെ തടഞ്ഞത് ഞാനാണെന്ന രീതിയിൽ ആവശ്യമില്ലാത്ത ചില വിവാദങ്ങൾ വരുന്നുണ്ട്; ഒരു വില്ലൻ കഥാപാത്രത്തിലേക്ക് ഒതുങ്ങിപ്പോകാൻ റിസ ആഗ്രഹിച്ചിരുന്നില്ലെന്ന് കലാഭവൻ അൻസാർ

4 weeks ago 6

Curated by | Samayam Malayalam | Updated: Sep 16, 2021, 7:43 PM

റിസബാവയുടെ മരണത്തിന് ശേഷമുയർന്ന വിവാദങ്ങളിൽ പ്രതികരിച്ച് കലാഭവൻ അൻസാർ

കഴിഞ്ഞ ദിവസമാണ് നടൻ റിസബാവ ഓർമ്മയായത്. വില്ലൻ വേഷങ്ങളിലൂടേയും സ്വഭാവനടനായും തിളങ്ങിയ താരത്തിന്‍റെ പെട്ടെന്നുള്ള വിയോഗം മലയാള സിനിമാലോകത്തിന് തീരാനഷ്ടമാണ്. നിരവധി താരങ്ങളും ആരാധകരും റിസബാവയുടെ മരണത്തിൽ അനുശോചനം രേഖപ്പെടുത്തിയിരുന്നു. അദ്ദേഹത്തിന്‍റെ മരണത്തിന് പിന്നാലെ ചില വിവാദങ്ങളും സോഷ്യൽമീഡിയയിലുള്‍പ്പെടെ ഉയര്‍ന്നിരുന്നു.

നിലപാട് വ്യക്തമാക്കിയിരിക്കുകയാണ് കലാഭവൻ അൻസാർ

റിസബാവയെ അന്യഭാഷാചിത്രങ്ങളിൽ അഭിനയിക്കുന്നതിൽനിന്ന് തടഞ്ഞതാരാണെന്നുള്‍പ്പെടെയുള്ള കാര്യങ്ങളാണ് സോഷ്യൽമീഡിയയിൽ ചര്‍ച്ച. ഇപ്പോഴിതാ ഈ വിഷയത്തിൽ നിലപാട് വ്യക്തമാക്കിയിരിക്കുകയാണ് കലാഭവൻ അൻസാർ. മനോരമ ഓൺലൈനിന് നൽകിയ അഭിമുഖത്തിലാണ് അൻസാർ ഇത് വ്യക്തമാക്കിയിരിക്കുന്നത്.

പിതാവിന്‍റെ പാത പിന്തുടര്‍ന്ന് നാടകത്തിലെത്തുകയായിരുന്നു

റിസബാവയും താനും ഏറെ ചെറുപ്പം മുതൽ സുഹൃത്തുക്കളാണെന്നും പശ്ചിമ കൊച്ചിക്കാരാണെന്നും അൻസാർ പറയുന്നു. പിതാവിന്‍റെ പാത പിന്തുടര്‍ന്ന് നാടകത്തിലെത്തുകയായിരുന്നു. റിസ അവതരിപ്പിച്ച സ്വാതി തിരുനാൾ എന്ന കഥാപാത്രം ഹിറ്റ് ആയ ശേഷമായിരുന്നു അദ്ദേഹം സിദ്ധിഖ്-ലാലിന്‍റെ ഇൻ ഹരിഹർ നഗർ എന്ന സിനിമ ചെയ്തത്. അവരോട് റിസയെ പരിചയപ്പെടുത്തിക്കൊടുത്തത് താനായിരുന്നുവെന്ന് അൻസാർ‍ പറഞ്ഞു.

വില്ലൻ ആയാൽ ആ ലേബലിൽ വീണുപോകുമോ എന്ന പേടിയുണ്ടായിരുന്നു

നടൻ രഘുവരന്‍റെ ഡേറ്റ് കിട്ടാതായതോടെ അവര്‍ റിസയെ പ്രധാന വില്ലൻ കഥാപാത്രം ആക്കിയാലോ എന്ന് ആലോചിച്ചു. എന്നാൽ വില്ലൻ കഥാപാത്രം ആണെന്നറിഞ്ഞപ്പോൾ താല്പര്യമില്ല എന്നാണ് ആദ്യം റിസ പറഞ്ഞത്. അദ്ദേഹം പശുപതിയിൽ നായകനായി ഇതിനിടയിൽ അഭിനയിച്ചിരുന്നു. പശുപതിയിലേക്കും അദ്ദേഹത്തിന്‍റെ ചിത്രം കൊടുത്തത് ഞാൻ ആയിരുന്നു. വില്ലൻ ആയാൽ ആ ലേബലിൽ വീണുപോകുമോ എന്ന പേടിയുണ്ടായിരുന്നു. ഞാൻ പക്ഷേ അവനെ നിര്‍ബന്ധിപ്പിച്ചു. മേക്കപ്പ് ഇട്ടു വന്ന റിസയെ കണ്ടപ്പോള്‍ ഞാൻ അത്ഭുതപ്പെട്ടുപോവുകയായിരുന്നു. അത് ഹിറ്റായതോടെ റിസയുടെ ജീവിതം തന്നെ മാറിയിരുന്നുവെന്ന് അൻസാർ പറയുന്നു.

മനസ്സാവാചാ അറിയാത്തൊരു കാര്യമാണ്

ഇപ്പോള്‍ അദ്ദേഹത്തിന്‍റെ മരണശേഷം അന്യഭാഷ ചിത്രങ്ങളിൽ അദ്ദേഹത്തെ അഭിനയിക്കുന്നതിൽനിന്നു തടഞ്ഞത് ഞാൻ ആണെന്നൊക്കെ ചിലത് വരുന്നുണ്ട്. അത് ഞാൻ മനസ്സാവാചാ അറിയാത്തൊരു കാര്യമാണ്. അത് പടച്ചുവിട്ട ആളുടെ ലക്ഷ്യമെന്താണെന്ന് അറിയില്ല, മലയാളത്തിൽ വില്ലനായി അഭിനയിക്കുന്നതിന് റിസയെ നിർബന്ധിച്ച ഞാൻ മറ്റു ഭാഷാചിത്രങ്ങളിൽ വില്ലനായി അഭിനയിക്കണ്ട എന്ന് റിസയോട് പറയുമോ എന്ന് അൻസാർ ചോദിച്ചിരിക്കുകയാണ്.

Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക

ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ

Web Title : kalabhavan ansar on riza bava's death and his film career
Malayalam News from malayalam.samayam.com, TIL Network

Read Entire Article